文:MenClub 艾力克  
POSTED ON 07 Jul 2021

相信飽受過智慧牙折磨嘅朋友,都會有一刻懷疑過隻牙除咗用嚟剝就冇其他用途,仲要冇端端洗幾千蚊搵牙醫。不過最近美國賓夕凡尼亞大學一份研究指出,剝過智慧牙嘅人對甜、鹹、酸、苦分辨能力更高,從而改善味覺。

研究團隊搵嚟1,255名志願者分成兩組人展開嗅覺及味覺研究,其中一組(891人)平均20前就剝咗智慧牙,而另一組(364人)就冇剝。研究員分別要求每位志願者品賞含有蔗糖、檸檬酸、氯化鈉(鹽)以及咖啡因嘅溶液,比較兩組實驗結果後發現,有剝智慧牙嘅人對所有口味感知度比冇剝嘅人高出3-10%。另外亦發現,無論有冇剝智慧牙,味覺敏感度都會隨年齡增長而下降,而女性味覺比男性更敏感。

對於實驗結果,賓夕凡尼亞大學嗅覺及味覺中心主任Richard Doty猜測,由於剝智慧牙手術可能會誤傷到連接舌頭前部味蕾嘅神經,令到有近20%人啱啱剝完牙嗰陣會覺得味覺有所下降,但隨住神經修復,味覺會變得比以前更靈敏,但實際原因值得再深入研究。同時佢都唔建議大家為咗提升味覺而去剝智慧牙,因為差異冇想像中咁大,只有提升3-10%,而且大部份味覺都係嚟自氣味,相對之下個鼻較為重要。

資料來源:penntoday