POSTED ON 10 Dec 2014
| 男士們，童年嘅回憶又嚟搵你喇！中、小學雞年代必睇嘅《魔動王》又有新玩具，今次係Megahouse Variable Action Hi-SPEC系列嘅地隱俠，實物啱啱喺日本Variable Action Festival入面亮相，睇見有冇令你有衝動想嗌句：「大地鼓動，出嚟啦，大地神劍」呢？ | |
| |
| 但係你問點解地隱俠唔同咗樣？梗係啦，呢隻其實係OVA《最後的魔法大戰》入面隻究極地隱俠，或者唔係好多人睇過呢套OVA，對佢嘅印象係生疏啲㗎喇。我就覺佢嘅造型比元祖同超級地隱俠更加美形，不過就有師兄嫌佢太似高達，有傳佢真係由高達機設大河原邦男design，似都唔出奇啫。 成隻究極地隱俠約高180mm，價錢同推出日期都未定。比較可惜嘅係，佢嘅原設定係唔識變成人頭，所以冇得玩變身，只可以郁手郁腳display。點都好，童年回憶係無敵嘅，尤其係當你有睇過呢套OVA同有儲開呢個系列，唔買都買咗咁多隻魔動王同邪動王/神，睇怕最終都會磅水買埋呢隻。但請放心，OVA入面講佢係由地隱俠、風飄俠同水捲俠合體而成，所以唔會再有究極風飄俠同究極水捲俠㗎喇！ | |
| |
