文:MenClub 艾力克  
POSTED ON 27 Sep 2021

自從電競行業興起,市面上就充斥住各式各樣嘅電競產品,除咗滑鼠、鍵盤、耳機呢啲基本嘢之外,你又估唔估到原來寢具都可以「電競」?最近日本電競傢俱品牌Bauhutte就推出咗一款「電競床墊」,聲稱可以改善玩家睡眠環境,而且適合長時間瞓喺上面打機。

據官方介紹,床墊由高彈性聚氨酯(PU)製成,每個位置彈力強度都唔一樣,能夠好好承托成個身體,令用家嘅肩膀同臀部唔會「凹陷」太多,加上網狀床笠能夠有效排濕,就算大汗人士都唔怕會瞓到成身濕晒。總共有單人、半雙人、雙人三個尺寸選擇,而且仲可以捲埋一嚿方便收納同攜帶。

至於電競功能方面,官方就話床墊能夠治癒玩家疲倦嘅身體,就算長時間瞓喺上面打機都冇問題,方便大家咩都唔做,躺平打機。不過張床墊單人尺寸售價為28,500日元(約$2000港幣),換言之大家想舒服躺平之前,都要付出唔少㗎!

好可惜今次Bauhutte冇再搵「伊織萌」做代言人,否則銷量可能更上一層樓!

資料來源:bauhutte