文:MenClub 艾力克  
POSTED ON 24 Nov 2022

自去年中國爆出精神鴉片論」後,有關當局隨即加強未成年人打機管制,除咗嚴格落實遊戲帳號實名註冊制度、限制「課金」,更規定網遊企業只能夠喺周五、周六、周日及法定假期晚上8點至9點向未成年玩家提拱1小時服務,避免廣大好青年沉迷打機。

相關政策實行一年多後,近日中國音數協遊戲工委、中國遊戲產業研究院以及伽馬數據就聯合發表《 2022 中國遊戲產業未成年人保護進展報告》,宣稱未成年人沉迷遊戲問題已基本解決。

報告顯示,75.49%未成年玩家每周遊戲時間少於3小時,相比起2021年嘅67.76%更高。而課金方面,今年就只有15.43%未成年玩家未經父母同意下偷偷哋課金,比2021年數據(28.61%)減少約13%。

咁冇得打機,時下嘅年青人又有咩做呢?報告指出,大部份未成年玩家受到限制後,就將時間轉投落睇片同睇微博,其中微博及小紅書等社交平台使用率更比2021年多出約2.6倍。唔知當局有冇打算限制埋未成年人睇片時數呢?

資料來源:新浪科技