文:MenClub 魏文青  
POSTED ON 04 Mar 2022

傳說中,一個男人如果去到30歲都仲係處男,就會轉職成為大魔法師。講就講到30歲好似好遲,但我身邊又的確係有異性戀男性朋友到30歲都從未與任何人有過「負距離」嘅接觸,咁實際上全球男士又大概係幾歲「失去」自己嘅第一次?幾歲算係早?幾歲算係遲?英國近來就出咗個報告,列哂全球35個國家嘅男性平均「第一次」年齡,大家可以Check下自己有冇跑輸大市啦!

圖片:Manual

呢個報告由英國網站《Manual》分析Durex及DrFlex數據得出,主要列出咗不同國家嘅男士於性愛方面嘅各項數字。例如佢會話你知,全球男士一生平均性伴侶數目係9.3個,其中土耳其男士乃係35個國家中擁有最多性伴侶嘅,平均每人一生會有14.5個,之後係澳洲 (13.3個) 與紐西蘭 (13.2個),亞洲國家排最高嘅係日本有10.2個,甚至比大家覺得好熱情嘅巴西 (9個)仲多。而榜尾嘅就係世界人口最多嘅兩個國家,中國 (3.1個) 及印度 (3個)。

圖片:Manual

而第一次年齡方面,冰島就以15.6歲位居榜首,北歐三國丹麥、瑞典、挪威就分別以16.1、16.2及16.5歲成為隨後,然後個歲數就大致按國家地理分佈,呈北向南、西向東嘅趨勢增長。尾四都係亞洲國家,分別係日本 (19.4)、中國 (22.1)、印度 (22.9)及馬來西亞 (23)。

但講到結婚年齡,個趨勢幾乎就係倒轉。印度男性平均26歲就結婚,中國男性於27.1歲,然後少少出乎意料地係俄羅斯及土耳其,然後先係馬來西亞,而日本就以30.9歲排12。最遲結婚嘅就係澳洲,平均要近40歲 (39.3)先會成家立室,再考慮到澳洲男士平均18歲未夠就第一次、人生平均有13個性伴侶,佢哋都真係慢慢揀到啱為止喎!

資料來源Manual