文:MenClub 艾力克  
POSTED ON 16 Mar 2021

最近天氣忽冷忽熱,日頭出太陽就熱到著短袖衫都出晒汗,夜晚翻風又有啲涼涼地,最好就著返件薄薄地嘅外套出街,有Layer之餘又唔怕「攝親」。講到易襯,又點少得ALPHA INDUSTRIES?佢哋最近推出2021年春夏系列,入面有幾件薄軍褸,唔知又啱唔啱大家心水。

相信講到ALPHA INDUSTRIES,大家就會諗起MA-1飛行員外套同埋M-65戰地風衣,型仔得嚟又好襯,不過依家著就熱到中暑都似。佢哋近日所推出嘅2021春夏系列,圍繞「軍事訓練學校」為靈感,打造出一系列以海陸空三軍訓練為主題嘅軍事服飾。

L2B外套($1,299)係經典飛行員外套MA1嘅薄身款,無咗夾棉層,同MA1一樣採用短腰身無領設計,適合春夏穿著。
今季全新設計嘅Training Suit外套($1,099),靈感來自空軍嘅Training Suit,採用聚脂纖維企領拉鍊風衣,前後均印上會反光嘅品牌Logo同軍字印花。如果搭配同系列Training Jogger,可輕鬆打造軍事風格造型。

呢款Training Jacket參考BDU shirt嘅軍事襯衫($1,099黑、深卡其色,$1,199迷彩),可以扣鈕著,又可以唔招當外套咁著又得。肘部有額外縫製加厚材料,從而提高耐磨性。另外採用織帶車花嘅帆布章代表傳統軍服名牌及軍階,背面亦印上軍字印花。

如果覺得軍事風太型格唔啱你Style,同場加映意大利戶外服裝品牌Save The Duck 2021春夏系列外套。佢哋今季同日本潮牌F/CE設計師山根敏史合作,推出Skyscraper聯乘系列,用上防風又防水Recycled Gore-tex物料,著住出街定係上山下海都唔係問題。