文:MenClub 魏文青  
POSTED ON 29 Nov 2021

一個名人穿著某啲衣物,有時真係會引起熱潮。例如早前一名老年男歌手嘅「K」字愛鞋,就因為傳說有壯陽效用 (誤) 而被搶購一空;而北韓近年亦因為領導人金正恩愛穿長皮褸而掀起熱潮,但好明顯金正恩就唔鐘意人哋抄佢著衫,因為近日有消息傳出,北韓當局化身「時裝糾察隊」充公哂北韓所有皮褸。

圖:美聯社

據多間媒體引述自由亞洲電台 (RFA) 報導,自2019年北韓領導人金正恩身穿長皮褸現身之後,北韓境內就掀起一陣皮褸熱,金正恩妹妹金與正、其他高級官員紛紛穿上長皮褸,繼而吸引民眾爭相模仿。起初北韓商人會於中國入口真皮大褸,但好快被有錢人搶購一空,而平民百姓亦買唔起,於是後來就改為進口人造皮,並於北韓國內製造販售,結果就搞到一街都係長皮褸。

照計你班國民鍾意你,鍾意到好似追Mirror咁你著咩佢都跟住著,作為一個領導人應該好開心。但金正恩似乎就唔係咁諗。據報目前北韓當局開始搜查製造及販售呢啲皮褸嘅地方,甚至如果見到有人著長皮褸出街,就會直接沒收。《RFA》引述消息人士指,北韓民眾對於自己用錢買嘅皮褸被沒收感到非常不滿。

圖:美聯社

點解金正恩會咁大反應?據報就係因為佢覺得長皮褸乃係權力嘅象徵,而依家啲人唔單止跟佢著,仲要連個款都係跟住佢著嗰件黎抄,搞到成件事Cheap哂。據知北韓警方回應民眾嘅怨言時指:「著領導人同款係『挑戰最高領導人權威』。」仲話只有黨有權決定邊個可以著皮褸。

資料來源:蘋果新聞網