文:MenClub 艾力克  
POSTED ON 01 Jun 2022

日前有位喬裝成輪椅老婦嘅男士,忽然向名畫《蒙娜麗莎》(Mona Lisa)掟蛋糕引起全球關注,同時被二創成各種Meme瘋傳。以玩味見稱嘅日本潮牌Fxxking Rabbits(#FR2)亦非常快手,隨即出咗件T-Shirt抽水!

呢件名為「Protect the earth」嘅T-Shirt背面印上事發當時情況,遊客們紛紛舉高電話影低歷史性一刻,而胸前衫袋就寫上「A Piece of Cake」呼應主題,衣服左下角就有一舍經典兔仔LOGO。官方就係IG抽水表示:「反映現代社會的PhotoT恤。雖然向蒙娜麗莎扔蛋糕也保護不了地球,但是開始預售了。」目前已於官網開放預購,售價為7700日元(約$470港幣)。

事緣於5月29日,一名男子戴上假髮喬裝成坐輪椅老婦進入巴黎羅浮宮,靠近名畫《蒙娜麗莎》嗰陣,突然起身並試圖打碎保護油畫嘅防彈玻璃,發現打唔爛就改為掟蛋糕,被保安帶走時更以法文高呼「想想地球,世人正在摧毀地球」,疑似係環保人士。幸好防彈玻璃堅固,名畫並冇受損。