文:MenClub 艾力克  圖:互聯網
POSTED ON 27 Jul 2022
【大海撈針】9年前誤掉硬碟冷錢包!英男斥資千萬於垃圾場尋找8000枚比特幣

隨住近年加密貨幣興起,唔少早期比特幣(Bitcoin)玩家一夜暴富,嚟自英國威爾斯嘅軟件工程師James Howells理應係其中一分子嘅,但好可惜佢喺2013年就唔小心將存有8,000枚Bitcoin嘅硬碟(現市值約1.7億美金),誤當成已損壞嘅硬碟遺棄...

據外媒《BusinessInsider》報導,James Howells早於2009年已參與Bitcoin挖掘,並將所得嘅8,000枚Bitcoin存放於硬碟冷錢包,但可惜喺2013年,佢就唔小心將含有Bitcoin嘅硬碟,當成另一個外觀一模一樣,但已損壞嘅硬碟遺棄。當Howells發現嗰陣,硬碟已伴隨其他垃圾送到佔地約一座足球場嘅威爾斯新港垃圾場。

由於8,000枚Bitcoin喺當年亦係一筆可觀資產(當時市值約100萬美金),驅使James Howells近10年嚟不斷向新港市(Newport City)議會申請挖掘垃圾場,但通通都被昂貴及破壞環境為由拒絕。不過Howells冇因此而心息,更搵嚟人工智能專家、數據提取專家、垃圾場挖土機專家、廢物管理顧問等人組成專業團隊,其中一位成員更幫過哥倫比亞號穿梭機黑盒解密。另外,為避免工人將硬碟挖出後會偷偷帶走,Howells將會架設24小時CCTV監測工人活動,並聘請兩隻波士頓動力機械狗「Spot」做監工,見疑即報。

James Howells預計開採計劃將耗時3年,成本高達1100萬美元,目前已獲得兩間風險投資公司資助,待新港市議會批准後便可開工。

資料來源:BusinessInsider