文:MenClub 魏文青  
POSTED ON 12 Oct 2022

喺科幻電影中,「小行星撞擊地球」係常見嘅「末日危機」,事實上科學家近年亦多次警告地球正面臨小行星撞擊嘅危機,問題只係幾時發生。不過NASA近日就宣佈成功「擊退」一粒小行星,換言之面對小行星撞擊危機,地球或者係有自保方法。

圖片:NASA

呢項名為「DART」嘅計劃,其實早於去年就已經開始實行。去年10月時NASA宣佈會發射一個飛行器,主動撞擊一粒位於地球650萬英里以外,直徑約525英尺(160米)嘅隕石「Dimorphos」。撞擊只會令隕石嘅速度減少約1%,但只要個位撞得啱,就可以四兩撥千斤地改變隕石嘅前進方向,從而「推走」粒隕石。

據知飛行器已經於數星期前成功撞上隕石,而經過兩個星期嘅觀察,NASA於美國時間週二宣佈成功改變隕石嘅前進方向。證明「推走隕石」呢個保護地球嘅方法係可行嘅。

圖片:托洛洛山美洲際天文台

NASA指出,只要有足夠時間,理論上「DART」就能夠推走任何向地球方向飛嘅小型隕石。不過值得一提嘅係,2019年有一粒名為「2019 OK」、直徑60-130米嘅隕石,於最接近地球前一日先被發現,最終「2019 OK」於地球外4.4萬英里略過,僅為月球與地球之間距離嘅五份一。

資料來源:NASA